0

Yığmamızın baş məşqçisi: İki çəkidə problemimiz var

Baxış: 49

Yığmamızın baş məşqçisi: İki çəkidə problemimiz var

Yanvarda Dağıstanın paytaxtı Mahaçqalada təlim-məşq toplanışı keçən sərbəst güləş üzrə yığmamız hazırda məşqləri Olimpiya Güləş Mərkəzində davam etdirir. 

Press-az.com xəbər verir ki, millimiz bir neçə gündən sonra 2019-cu ildə ilk sınağını İranda keçiriləcək “Təxti kuboku” ilə verəcək.

Yenidən əsas komandanın baş məşqçisi təyin olunan Saypulla Absaidov AGF-nin saytına açıqlama verib. Təcrübəli mütəxəssis əvvəlcə ilk toplanış haqqında fikir bildirib: 

“Mövsümün ilk toplanışı hazırlığın bazası sayılır. Bu üzdən əsas diqqəti funksional hazırlığa yönəltmişdik. Ötən il dünya çempionu olan üç dağıstanlı güləşçinin də yer aldığı yerli komandayla birgə toplanış keçmək bizim üçün çox vacib idi. Bu öz gücümüzü görmək və rəqibi qiymətləndirmək üçün önəmliydi.

Nəyin üzərində necə işləməli olduğumuzu bu toplanış sayəsində təhlil edə bildik. Çatışmayan cəhətlərimizi gördük. Orada yüklənmə fonunda hazırlıq keçdik. Fiziki hazırlıq və sürət üzərində işlədik. Qısası, Mahaçqala toplanışı bizim üçün çox faydalı oldu”.

Yığmamızın çalışdırıcısı qarşıdakı planlardan da danışıb: 

“Hazırda komanda tam ideal formada deyil. Onsuz da bizə indiki vaxtda pik formada olmaq lazım deyil. Əsas odur ki, Avropa çempionatınadək hazırlığımızın zirvəsinə çataq. İranda layiqli mübarizə izləyəcəyimizi düşünürəm. İki çəkidə problemimiz var. 57 və 125 kq-da çıxış edən güləşçilərimiz zədəlidir. “Təxti kuboku”ndan sonra intensiv hazırlıq mərhələsinə start verəcəyik.

Növbəti təlim-məşq toplanışını Kislovodskda keçəcəyik. Bu toplanışda da ağır yükləmələr – fiziki və funksional hazırlıq, sürət üzərində çalışmalar prioritet təşkil edəcək. Ondan sonra son hazırlığımızı keçib, Avropa çempionatına yollanacağıq. Qitə birinciliyinə “bir nömrələr”lə qatılmağı planlaşdırırıq. Çünki bu yarış II Avropa Oyunlarına vəsiqə verəcək”.

MƏTNDƏ SƏHV TAPMISINIZ?

Maus ilə səhvi işarə et , CTRL+ENTER düymələrinə toxun
Səhvi açılmış pəncərədən bizə yollayın

Hazırladı: PressAz